“დასავლეთმა ტოტალური ჰიბრიდული ომი გამოგვიცხადა – მისი შედეგები ყველას შეეხება!” – სერგეი ლავროვი

(ACCnews) “დასავლეთმა ჩვენს წინააღმდეგ ტოტალური ჰიბრიდული ომი გამოაცხადა და რთულია, წინასწარ განჭვრიტო რამდენ ხანს გასტანს ეს ყველაფერი,” – ამის შესახებ რუსეთის საგარეო საქმეთა მინისტრმა, სერგეი ლავროვმა რუსეთისთვის დაწესებული სანქციების საკითხის კომენტირებისას დღეს განაცხადა.

მისივე განცხადებით, რუსეთი ყველაფერს აკეთებს იმისთვის რომ დასავლეთის მხრიდან პირდაპირი კონფრონტაცია თავიდან აიცილოს.

“ჩვენს წინააღმდეგ ტოტალური ჰიბრიდული ომი გამოაცხადა და რთულია, წინასწარ განჭვრიტო რამდენ ხანს გასტანს ეს ყველაფერი, თუმცა ნათელია, რომ შედეგები გამონაკლისის გარეშე ყველას შეეხება. რუსეთი აკეთებს ყველაფერს, რათა აირიდოს პირდაპირი კონფრონტაცია. თუმცა ვინაიდან გამოგვიწვიეს, ჩვენ, რა თქმა უნდა, ვიღებთ [ამ გამოწვევას]. ჩვენთვის უცხო არაა სანქციები, სხვადასხვა ფორმით ისინი ყოველთვის გვქონდა. რაც გასაკვირია ესაა აბსოლუტურად ღრმა რუსოფობიული აფეთქება, რაც ყველა ე.წ ცივილიზებულ ქვეყანაში გამოჩნდა. პოლიტკორექტულობა, ზრდილობა, წესები და მათთან ერთად სამართლებრივი ნორმები უბრალოდ ნადგურდება, ყველაფერი რუსულის გაუქმების კულტურა ჩნდება, ჩვენი ქვეყნის წინააღმდეგ ყველანაირი მტრული ქმედება დაშვებულია, მათ შორის პირდაპირი ძარცვაც,” – განაცხადა სერგეი ლავროვმა.

შეგახსენებთ, უკრაინაში სამხედრო მოქმედებების დაწყების შემდეგ საერთაშორისო საზოგადოებამ რუსეთის წინააღმდეგ მკაცრი ეკონომიკური სანქციების პაკეტი აამოქმედა.